聖誕快車開鑼，有曼城打頭陣於主場迎戰愛華頓，近況甚頹嘅藍月亮，已經跌到聯賽第7位，相信唔少球迷都開始習慣藍月亮戰績倒退嘅事實，今場面對排名第15位嘅拖肥糖，相信都唔敢話輕易取勝。
藍月亮上場作客維拉以1比2落敗，全場表現處於下風，而且後防表現騰騰震，創下近12場只得1場勝仗嘅劣績。主帥哥迪奥拿要解決嘅問題相當多，除了面對傷兵問題，仲要解決球員信心危機，今場面對拖肥糖都唔係易事，哥帥真係聽到都頭痕。唯一慶幸係菲爾科頓上場攻入佢今季開齋波，相信有助加強信心。
戴治領軍守強攻弱
愛華頓連續兩場悶和阿仙奴同車路士0比0，相信球員信心十足，去應付今非昔比嘅曼城，特別係主帥戴治帶領下，拖肥糖保持守強攻弱嘅風格，門將比克福特近期表現出色，面對藍月一眾啞火射手，估計大有發揮機會。今場雙方氣勢此起彼落，拖肥糖會繼續保持穩守突擊風格，加上聯賽快車展開，今場入球唔會多。文:謝德謙
