歐國盃D組最後一輪，法國對住已篤定出局嘅波蘭。法國和波就夠出線，佢哋今屆兩仗只入1球，進攻太過依賴基利安麥巴比，其餘攻擊球員狀態亦欠佳。波蘭雖然已出局，但都想爭番口氣，必加強防務，2.5球入球細值捧。（Now 618周三凌晨零時直播）
法國最受人關注嘅，自然係鼻樑受傷嘅麥巴比幾時復出，事實上「麥總」可以話孭起成隊波，最近3次佢冇擔正嘅國際大賽，法國不勝之餘連波都入唔到，就算今屆首仗對奧地利有麥巴比掛帥，法國亦只係靠對手烏龍波小勝1比0，反映基沙文及奧士文尼迪比利等前鋒狀態麻麻，幫唔到手。雖然鋒力靠唔住，法國防守總算有啲水準，尤其中場尼高路簡迪冇跌Watt，令對手難越雷池，法國近3場保持不失，堪稱銅牆鐵壁。
波蘭頑抗要爭番口氣
波蘭兩戰全敗提前出局，但佢哋鬥心唔算曳，面對強敵係踢爭氣波嘅好機會，而且今仗有王牌羅拔利雲度夫斯基復出，或令法國有所忌憚。翻查兩隊過去6次對賽，5次總入球開2球或以下，入球細值得再追。
